Saturday, 26 March 2011

好玩麻將.給母親的禮物

近年母親的生日,不是出外晚膳便是付現金給她“買嘢食”,就是送禮物,多是她先選好,然後由S付款。今年大不同,送了一套圖中的好玩“騎呢”麻將給她。


這個“騎呢”麻將好玩之處,在於把廣東牌裡的八隻花,換成八隻“百搭”,分別是:

筒丶索丶萬丶番“皇”:每樣一隻,每隻分別可變身成為她代表那種牌的任何一隻,即是每隻有七(番子)到九個(筒索萬的一到九)“化身”
筒索萬:這個好玩,可變身成筒子丶索子丶萬子任何一隻
東西南北:故名思議,可變成東西南北任何一隻
中發白:就是中丶發丶白啦

最後一隻,dun dun dun dun

百搭:可變成任何一隻牌,亦即是全副牌中的眾人“摯愛”,有了她,簡直是心想便事成!!


這副麻將,最可愛之處,在於她的百變“形象”,想打廣東牌?當然可以;想打“騎呢”牌?只要用以上的百搭取代那八隻花便可以了;想打台灣牌?亦得,因為隨牌付上打台灣牌專用的“棒棒”四枝(其實打“騎呢”牌時也用的。)

然而,雖說「工欲善其事,必先利其器」,但打麻將這回事,剛有“武器”是不夠的,但S沒有耐性打,結果找來另外三個也是三月生日的朋友,今天和母親的新玩具“開齌”,但人算不如天算,其中一個的兒子今天生病了(希望他早日康復),今晚的晚飯聚會暫且閣置,至於“開齌”大戰,看看情形怎樣再作打算



後記,雖說晚宴閣置,但朋友們依然來了,改為家常便飯,但S的廚術不行,“騎呢”之處是晚飯由母親“煮”理,之後還為新牌“剪彩”,打了三圈,準時十時半收場!

J


7 comments:

PoCaRi said...

哇!!! 好吸引喎!!! 係邊度買到架???
不過照咁樣的話, 唔好計要比錢果個要計得準, 食糊果個淨係睇都有排睇呀!!

太難啦, 呢D牌對我黎講好易出事~~呵

SKII said...

Pocari,其實我都唔係好識打丶亦唔多識計番,但冇所謂,玩吓啫,今日打咗兩圈,比我誤打誤撞,食咗鋪叫唔知五“飛”定六“飛”的十三“妖”!!

SKII said...

Pocari,唔記得講,在廟街某麻將鋪買,唔係唔講得名,而係朋友幫我買,所以唔知間鋪頭叫乜名!如果你想知,我可以問。

PoCaRi said...

S: 哈~大約知邊頭就得架啦~等我得閒都去八下先. 哇~你咁勁可以食到十三么?! 你梗係拎住隻"筒索萬"係手啦!! 真係好似好好玩咁, 太吸引我啦! :D

你介唔介意借你張相黎用呀??

SKII said...

Pocari,洗完牌至想起,唔記得影低鋪十三么,我唔止攞住隻“筒索萬”,應該重有隻“番皇”丶”筒皇”同隻“百搭”,勁!所以至可以叫成五丶六“飛”。

你去鋪頭問時要好 specific 咁話比佢地知你想買有“百搭”呢種牌,因為一般應該冇現貨,有人訂才做,果八隻牌逐隻計錢的。

幅相,請隨意用。

另,打呢種牌都有佢自己的例,我唔係太熟,等我問吓朋友,有機會分享吓。

PoCaRi said...

Thank you!! :)

下次食舖大四喜記得一定要影低佢呀!! (我覺得大四喜仲難過十三么丫)

SKII said...

是的,大四喜應該比較難食,因為只可用“百搭”丶“東西南北”和“番皇”,其他百搭摸到返來重要打出去,好“搏”吓;但十三么就可以用晒全部百搭(如果夠運摸到的話)。

如果我食倒大四喜,一定要影低,但冇乜機會,因為我真係好少打!

Related Posts with Thumbnails