Monday, 23 July 2012

有瓦遮頭都濕晒!

今朝起床時,三號風球已經懸掛,但風雨都唔算太大,出門上班時,還想搏一搏,唔帶遮。從香港站行出來,經過有蓋的行人天橋行去上環,風勢、雨勢依然唔算大,只不過,啲風打橫吹過嚟,返到公司濕咗半邊身!啲頭髮重被吹到“癲癲地”,但還可以啦。

午飯約了朋友在中環,唔想因為落雨放飛機,如常赴約,食完又要經過同一條橋。。。

嘩,今次不得了!好多人塞咗喺天橋口到等,原來風大雨大,啲雨撇到得返半條橋可以行,而可以行果邊,因為太大風,就算有遮都開唔倒,就咁行過去,就算有瓦遮頭都肯定變“落湯雞”!


唔想濕身,唯有等!但雨勢似乎短時間唔會停。。。

於是,S 做咗一件低能事,就係為咗唔想濕身,用咗 $4.00 由中環搭地鐵去上環(因為從上環地鐵出,只需過一條極短嘅馬路就到公司),不但要比錢,重要上上落落行來行去,亦用多咗時間,但係都值得,因為重有成個下晝要做野,周身濕晒好唔舒服!放工時,由於太大風,亦行同樣的路線,唔係怕濕身,因為上次試過夜晚好大風丶好空曠時行,差點被風吹倒,唯有在地鐵內多行一點!

同場加映,從上環步往中環午飯時,在 Exchange Square 對出好多人圍觀,又有警察,向眾人目光方向一看,原來有個招牌就嚟“冧”,要出動到消防員救駕,有驚無險。。。




 

8 comments:

卡臣 said...

九號都嚟緊

攞你命三千 said...

訓醒左就乜事都冇又番過工

Coffee said...

聽日唔知點呢?

SKII said...

卡臣,九號掛咗了!

SKII said...

三千,預咗啦! :-P

SKII said...

Coffee,聽日?返工囉!

菲菲 said...

下午的「三號風球」,風力絕對可以媲美八號風球啦!如果唔係有李氏力牆,大家可以早幾粒鐘回家。

SKII said...

菲菲,係 wor,我冇諗起呢個力場添!

Related Posts with Thumbnails