Tuesday, 25 September 2012

植樹 @ 丹山河自然保育區


昨日晴朗嘅星期日,參加咗 Starbucks Coffee One Million Tree Project 合作的環保植樹工作坊,去丹山河自然保育區植樹。

丹山河?邊度嚟架?原來從粉嶺再入,去到至知就喺坪輋附近,即係最近成日上關於新界東北發展嘅新聞果度,附近亦有一行山名勝“流水響”。

中午時份喺旺角集合,市區天氣非常好,陽光普照,好到有啲悶熱添,大家重帶齊防晒丶遮陰等工具。點知去到粉嶺,落起大雨來!不過,既然都去咗大半,當然係“有前冇後”,繼續向目的地進發,去到至算。

到達起點,丹竹坑獅頭嶺村,雨唔止冇停,重越落越大,大家唯有喺平日村民用來等小巴的簷篷避雨,但並冇望天打掛,而係聽義工哥哥介紹附近發展的歷史同埋植樹的簡單須知。哈哈,M 聽得津津樂道!

原來,我地將會去植樹的丹山河一帶,屬於八仙嶺郊野公園範圍,“郊野公園”嘅地,唔一定會起到成個公園咁,更加唔一定會有燒烤爐,可以只係一片“荒野”,而我地將會植樹嘅地方,亦唔會好似啲乜野  xx 農莊咁“”好晒一塊塊丶整整齊齊嘅田。

聽歷史和理論大半個鐘,雨勢終於開始轉弱,但依然唔係太適合我地呢啲一家大細嘅業餘義工,於是先來一個繯村行,瞭解一下周圍的環境,咁,不如去片睇下啦。。。

沿途見到的,奶蕉丶蝸牛丶不知名的紅色蟲蟲丶村民自己種的收成。。。


雨後步行,份外清涼,不經不覺,行咗好耐吓,回到起點,已經四點幾,天氣雖然唔太穩定,但仍可向原定的植樹範圍出發,這是與回市區的反方向,一邊走丶一邊見到新舊建築交替。。。


終於,到達植樹的地點,係呀,就係呢度,都話唔係一塊塊整齊嘅“田”,而係。。。


專業義工帶來工具和樹苗,今日種嘅係白蘭,由於天氣始終唔太穩定,怕我地種種下又落雨,唔知點走亦有危險,於是由原定種八至十棵,改為八個人種一棵,總共三棵。。。


先由專業義工哥哥示範耡地,唔好睇佢個樣嬌生慣養丶成個書生咁,都有紋有路架。。。


Okay,到 S 試吓,嘩,個鋤頭好重,M 都有試, 農夫一啲都唔易做,希望佢明白,粒粒皆辛苦!(雖然而家養夫應該唔係咁耕種)。。。




 

4 comments:

攞你命三千 said...

小心鋤親人~!

SKII said...

哈哈,係呀,所以啲人唔會企喺後面或傍邊...

l.minor said...

義工哥哥企得你咁近...

SKII said...

minor,嘻嘻,佢可能覺得自己身手敏捷,要閃起上嚟走得快掛!

Related Posts with Thumbnails