Saturday, 23 February 2013

爛佬怕潑婦,咁潑婦怕邊個呢?


俗語有云“好佬怕爛佬,爛佬怕潑婦”,咁到底潑婦又怕邊個呢?

S 最近發現咗答案,但先講吓估仔。。。

話說 S 龍年行衰運,遇上蠻不講理又貪心嘅妖精,好彩 S 冇學妖精嘅一般見識,反而冷靜地分析事實丶沉着應戰,終於忍到有貴人出手相助(按此閱讀),事情而家算得上暫時告一段落。

其實呢件事並非完全反面,經過呢一役,S 亦有所得着,第一係 EQ 明顯有進步,二係事件成為活生生嘅反面教材比 S 去教 M 分析是非黑白,甚至學到一啲法律知識。

哈哈,進步咗嘅 EQ,最近有派用場,用來對付潑婦。。。

話說最近一個場合,橫蠻無理嘅潑婦不斷咁搵啲好夾硬嘅理由“砌”S 一方,一時話我地點做野丶有時甚至話我地唔做野,實情係果啲野唔關 S 一方事,S 於是嘗試解釋比潑婦聽點解,但不得要領,潑婦唔願聽之餘重打斷 S 的說話,但又繼續“砌”,一向 assertive S 再次重覆原因,但忍住冇發爛渣,點知。。。

潑婦好惡咁閙 S:唔關你地事呀,我係問呀邊個!!!

嘩!嘩!嘩!潑婦發惡,全場即刻鴉雀無聲啦。。。

怕事嘅人唔敢出聲,而八掛嘅人等“睇戲”嘛!睇咩戲?咪就係等睇 S 跟潑婦一樣發爛渣,咁咪好戲連場兼大把八掛是非講囉!!

點知 dead silence 咗幾秒,S 笑笑口回應:完全同意呀,咁呀邊個唔該你攪掂佢咯喎!!(其實呀邊個係有名有姓嘅,潑婦同 S 當時都係叫佢個名嘅,只係唔方便喺呢度寫)

哈哈,其實 S 想加多句話『嗱嗱嗱,都話唔關我地事架啦!』不過忍住咗,又唔係想撩交哎, 無謂降自己格啦!

反正潑婦自己都衰咗喺自己手上咯!正一“面就人地比,假就自已丟”,所以。。。

潑婦最怕嘅。。。咪就係佢自己囉!

以上小故事,如有雷同,實屬事實,皆因潑婦多過 7-11,“梗有一個喺左近”,如果要同佢地過唔去,咪即係搵自己笨!?但如果有人要自己對號入坐,咁適隨專便喇!

寫完呢個,S 去“覺覺”(睡覺)。。。

祝大家周末愉快!!





 

6 comments:

naruto said...

真係好多潑婦,認同呀

攞你命三千 said...

係啦唔好同佢地嘈埋一份

Desertfox said...

果然高招,小弟领教了。

Have a nice weekend!

SKII said...

naruto,係呀,而家都唔知咩世界!! >_<

SKII said...

三千,我以前都會架,但唔知係咪愈來愈老,費事嘥氣!!更唔會降自己格啦 ^_^

SKII said...

Desertfox,過獎了,我也只是在學習。。。

Related Posts with Thumbnails