Friday, 29 March 2013

地產霸權,保齡殞落



昨日同 M 去打保齡球,又收到一個令人失落的消息,就係位於 Emax 嘅保齡球城,將於四月一日結業。

失落!因為保齡球係 S 最愛嘅球類活動。

S 小時候尖沙咀有間叫 BurnswickS 總覺得喺果度打波會好有型,但果期 S 年紀太細,從來冇去過。

青少年年代,由於表妹 D 
家住港島,我地兩個去得最多嘅係南華會,80's 年代中,可以話係保齡球嘅光輝歲月。。。溜連得最多嘅係太古城、德福、淘大,遠小小有油塘丶美孚丶荃灣,後來新小小有沙田新城市丶黃埔。

經營一個有規模嘅保齡球場,地方要大,保養又多,因為保齡球道長闊丶左右要幾多位都有標準,而球道係木板丶重有運球機丶近年電子化咗嘅計分機,全部的保養都幾煩鎖。

到咗 80 年代尾丶90 年代中,香港地產起飛,而 S 嘅摯愛活動就開始殞落,租金貴,係極需要空間嘅保齡球場頭號殺手!!

最記得果年係 199X年,S 同另外三個都係去咗外國幾年嘅朋友相約去太古城打保齡,到咗太古城,搵極都搵唔到個場,大家都以為自己記憶力有問題,唔確定個位置,於是去查問,保安員驚訝地答「執咗笠好耐啦喎!」,我地幾個唔止面懵懵,重有啲失落。。。

而呢個重係一個非常持續嘅失落,之後德褔丶淘大相繼“執笠”。

取而代之係一啲唔受地產商“垂青”丶所以租金還可以嘅“過渡場”或“新場”,例如。。。

舊機場啟德大樓,在未落實發展計劃時,就曾經係一個好有規模嘅保齡球場,大約十年前,S 和好友 JC R 有幾年每個周末星期五丶或星期六晚就會喺果度“打躉”,個場雖然大,但打波嘅人更多,成日要等到半夜三更至有得打,但都不亦樂乎!

重有初開時嘅奧海城,果時不但冇自由行,連本地人都少嚟呢個場,所以亦有一個好大嘅球場,最記得某年 JC 生日,我地帶埋重係好細個的 M 嚟打波,但等到好夜丶M 又想玩但又唔聽話,S 發晒“脾四”,但爛玩嘅 S 結果都係打埋波至走。

之不過,呢啲記憶全部都變成“明日黃花”不可再了。。。

啟德大樓早已因為建郵輪碼頭而被移為平地。

而奧海城個場,喺 S 決定從新界大西北搬返出嚟九龍西果個星期“執咗笠”,記得嚟睇樓果排,M 次次話想去打波,S 總係話下次,第日我地住得近, 一定會再嚟,反正 weekday 嚟打好方便, 點知簽完臨約之後果個周末想去打,球場剛執咗笠。失落!

但更失落嘅係,因為咁,我地轉移去美孚,帶 M 去玩咗幾次,就被通知做咗 n 年嘅美孚,終於喺 2012 1 1 日結業!

尋日當 S M 兩母子去到 Emax,知道連呢道個保齡球城都會執笠,除咗失落,只能相對無言。

住喺香港,原來連想玩下自己鍾意嘅球類活動,都係一種侈奢!!





5 comments:

Ebenezer said...

現在沙田富豪花園還有,但每次經過見佢個死樣,我到懷疑點解佢仲未執笠?

卡臣 said...

我上次打保靈(2012年12月),也是在EMAX,乜又要執...

SKII said...

Eben,我未去過,下次走下!

SKII said...

卡臣,哈哈,我地果然係同年代,玩啲野真係差唔多! :-P

city said...

thanks for share........

Related Posts with Thumbnails