Wednesday, 27 March 2013

又係米芝蓮?唔 Like 喎!


農曆年前屋企樓下開咗間「添好運」,日日由朝早到 mid afternoon,總係大排長龍,原來話說“大有來頭”因為係米芝蓮嘅星級食肆云云。於是有啲啲心動,想試下。有次已經放完農曆年假,母親丶S M 想去試試,但見要排幾十個,唔食!

諗起 IFC 都有一間,又記得表妹 D 都去過,於是提議不如搵次午飯去果度,D 話食過覺得啲野食只係一般,唔單止要等位等好耐,人齊至入得無可厚非,但坐得非常的迫挾。Okay,收到,咁平日食晏就梗係唔去啦,費事同人迫嘛!

時間飛逝,就嚟復活節兼清明,因為要“清埋”去年的大假,今明兩日 S 放假,早上聯同母親同 M 一齊去拜祭父親,母親回程時提議如果唔駛排隊不如試試“果間”,S 讚成,但事先張揚將 D comment 話咗比母親同 M 知,等佢地唔好有太大期望。

不過,原來呢個世界,冇期望一樣會失望嘅,因為,實在太不知所謂。。。

首先,你為咗做生意,啲枱擺密啲丶同要搭枱,S 明白兼冇問題,又唔係啲乜貴價野,Okay 啦!但都唔係密到咁離普呀話

一個放咗七張兩人枱嘅 bench,其中六張係完全“痴”到實嚟放嘅,枱同枱之間連 1mm 的空隙都冇,咁點坐埋位呢?經典囉,要先拉開張枱,等客人坐咗入去之後就“關閘”,唔明?去片。。。


母親同 M 就係坐喺上圖見的男人對面同嬸嬸隔離,坐咗埋去,感覺尤如坐監,唔止要同隔離唔識嘅人痴埋一齊,最煩嘅係隔離走時又要拉枱,兼 waitress 執隔離枱時痴實 S,攪到周身唔聚財!要知道,S 成日去茶餐廳,無論幾迫幾細嘅茶餐廳,感覺都好過呢度。唔 Like

到啲食物。。。

第一道,皮蛋瘦肉粥,唔好講啲料同味道住,粥,就梗係要熱食架啦,佢只係微暖,“叮熱”慳埋,唔合格。

第二道,什菜春卷,皮厚丶油多丶又唔脆,“渣”!

蝦蛟,皮厚,入面嘅“閻”痴埋一“舊”,唔多覺隻蝦喺邊,盛惠二十四大元,雖然唔係好貴,但以一間有米之蓮級數的食肆,品質唔合格!

燒賣,除咗加咗粒己籽之外,唔覺有乜特別,都係廿四蚊。

另外牛肉球同煎蛋牛肉飯,S 冇食,冇 comment

食完之後,母親同 M 要等 waitress “開閘”至可以離開,終於“放監”,大家嘅 comment 係,以後唔會再嚟!只怪 S 一家都只係大鄉里,唔識欣賞米芝蓮呢類星級食肆,下次都係去返茶餐廳算了。反正大把人會去,一樣其門如市,少了 S 一家都唔少啦!







2 comments:

Ebenezer said...

嘩,貼錢買難受!

不過佢旺到咁揚,業主一定會狂加佢租,佢亦一樣好難生存。

SKII said...

我估佢而家未係好貴租,個場係信和嘅,呢個位開添好運之前冇乜人流,有可能係信和 offer 叫佢來做“開坊牛”,等成個 area “成形“變身成”食肆“區,肯定加!!

Related Posts with Thumbnails