Saturday, 22 June 2013

落街唔該先執好個樣!


星期六,忙裡偷閒同好友小 S  & Mrs. McDonald 下午茶,之後 S 送好友們去上堂,S 至獨個兒離開,點知呢頭同好友分手,果頭有人從後面嗌 S 個名,重要係全名!S 打個突,莫非好友咁快上完堂?定係漏咗野?轉頭睇睇。。。

哈哈哈,S 諗咗一陣,原來係 n 年冇見嘅舊同事,身邊有個男人,都係 S 嘅舊同事,當年三人齊齊做 trainees,後來佢兩個日久生情,結埋婚,今日身邊多咗兩個小女生。。。

B 小姐:去邊呀?

S:剛同朋友 tea 完,送咗佢地去上堂,啱啱諗住走,咁都比你見到。。。

B 小姐:一眼就見到你啦,你原全冇變呀!上次見到呀 K,佢變晒樣囉  ^_^

SL 先生:果個應該唔係呀 K 呀。。。

S:你都冇變呀!呀 K 好似唔喺香港喎。。。你住附近呀?  ^_^

B 小姐:唔係呀,我地住喺 XXX,帶佢地(女兒)嚟學野,你都送個仔呀?

S:哦,果度,我知呀,以前我喺你個屋苑包圍住果間學校讀書。。。哈哈,阿仔唔理我架喇,佢自己去咗學琴,頭先係送我啲朋友!

SL 先生:呀 K 好似去咗上海。。。你個仔唔駛理咩?幾大呀?

S:讀中學喇!

B 小姐:嘩,咁大個喇!話時話,你係咪重住喺 XX(新界大西北)呀?

S:唔係啦,搬咗去 XXX。。。

B 小姐:咦,方便咗好多喎。。。

一邊行,到咗佢地囡囡學野嘅大廈,於是 say bye bye 道別。。。

早兩日至同好友講開,S 識嘅人活動範圍好細下,成日撞到人,連喺住緊嘅大廈裡面都不時撞到,重要係“兜口兜面”果隻。

Mrs. McDonald 話:咁你出街最好執執個樣喇。。。

S:都係架,連落街買野都要呀! >_<





No comments:

Related Posts with Thumbnails