Tuesday, 27 August 2013

「狂舞派」,你看到自己麼?


呢期最潮本地電影,莫過於「狂舞派」,由於有大量跳舞場面,揀咗同 M “拍拖”入戲院睇,之前睇過介紹,大概知講乜,更有期望,但冇失望而回。

網上圖片
導演起用冇乜知名度丶但應該真係識跳舞嘅演員,其實更真實,令人更有共鳴,電影某啲場面喺 Poly (理工大學)取景,唔知係咪因為 S 自己喺 Poly 流漣過一年丶又做過一年某學部,雖然同跳舞無關,但 S 同戲裡嘅年青人一樣,花咗大量時間喺學部,因此特別有感,重頗有“那些年”嘅味道添。

呢齣電影,青春同 passion 係最大嘅亮點(賣點),就算係唔識跳舞一族,應該都梗有啲野令人找到共鳴耶。。。

例如女主角阿花,想入大學根本唔係為讀書,而係為跳舞丶甚至係為咗想識 “Dan So”(Dancing Society) 嘅型男 Dave,睇落幼稚,但慘得過佢青春大晒,為咗找尋自己嘅愛好丶又可追男仔,果個年紀輸得起,so what!?

但最觸動 S 嘅並唔係呢個位,而係阿花發現(定明白?)自己鍾意咗個萬人迷,既然對方模稜又兩可,於是選擇“走得比你早”,反而至有機會被超老土嘅“七良”用太極去感動阿花,呢個真係勾起無限回憶,因為當年都有一個咁嘅人,喺 S 唔知自己想點嘅時候,陪住 S 做一啲佢根本唔鍾意(但應該唔討厭掛)丶又唔知係乜嘅野,總之 S 鍾意,佢就陪伴左右。

不過,S 最後冇同佢一齊丶亦冇好似阿花咁,為自己最鍾意嘅野(寫作)而堅持,反而選擇走咗“佬”(離開咗香港)。。。

所以,齣戲某程度上為 S 成就咗夢想!

哈哈,唔知其他人又睇到啲乜野呢?





 
Related Posts with Thumbnails