Tuesday, 17 September 2013

比地鐵呃咗 $3.5


今晚(其實已經係昨晚)好夜放工,而家又已經係夜深,都要寫埋呢篇 blog relax 吓至捨得瞓。

由呢個星期開始 project schedule tight丶加上 this week is only 4-day week丶加加上平常要做嘅野,又再加加加上 S 自製 looooooooooong weekend 下星期放幾日假,tight 上加 tight ,真係一日有 48 個鐘都唔夠用,於是星期一朝早,就算唔早到都最少要準時返工,點知落到地鐵站。。。

入閘之後發現有一堆堆人圍住啲地鐵職員問長問短,已經覺得奇,行到 escalator  至發現,落月台嘅電梯停咗,原來東涌線有故障,月台已經塞滿人,於是停咗電梯唔比人再落去,S 唔知點好,企咗一陣,聽下啲職員答其他人講乜,當然係 standard 果啲  model answer”即係答咗等於冇答!又再過咗一陣,S 問究竟知唔知幾時回復(雖然明知冇答案,都忍唔住問),職員唔知答乜,S 不滿話:咁就一早唔好比人入閘啦!

點知說時遲那時快,佢真係宣報連入閘機都 cut 埋!

一向唔鍾意坐以待斃嘅 S ,於是選擇從原站出閘(比佢扣咗 $3.5),行路去搭小巴再轉地鐵“荃灣線”過海,希望東涌線嘅故障未大件事到塞埋其他線。如是這,不但止要行多咗路丶又要等小巴丶又要由荃灣線轉港島線,更要比多啲錢至返到公司(平時 $10.8 vs 今日 $15.??),煩!

但煩得來都算好彩,第一架小巴已經有位,地鐵在金鐘轉往上環亦唔太迫,終於“順利過渡”返到公司,都唔算遲太多(其時九點廿幾分),但始終唔忿氣比多果三個半(轉咗一大輪車,total 其實係比平時多五個幾,但算,淨係計佢收多 S 的原站出果 $3.5),皆因唔係幾蚊嘅問題,而係反正你(地鐵)都已經封咗電梯唔比人落月台,咁索性叫人喺閘外等啦,要知道,閘裡閘外,係兩個世界呀!因為閘外係偌大嘅商場,就算乘客選擇等,都唔駛咁侷嘛,侷暈人就唔好啦!

Okay,寫完,明天又是新一天!





No comments:

Related Posts with Thumbnails