Thursday, 31 October 2013

愛靚與 EQ


S EQ 近期突飛猛進,見証着 S 這個改變的朋友們,全部都給 S 至少一個 like,有的還問 S 如何做得到?


hmm…

也許真的因為年紀大,有如網上流傳某個流行格言所說,日子愈來愈少、每一天都愈來愈重要,真的 afford 不起把精神和心思,花在那些無無謂謂的人或事之上。而且對着那些爛人,如果以他們同樣手法“勝”過他們,豈不是比他們更爛? No way

之不過,最大的原因其實是,最近被工作折騰至剩下“半條人命”,天氣轉變加上睡不好,令皮膚異常敏感和乾燥,因此更要常常保持心平氣和,絕對不能輕易動氣,皆因動怒時皮膚自然繃緊, 皺紋也長得快些又多些,而情緒過份波動更會影響內分秘,對身心佰害而無一利嘛!

所以,愛靚的話,先提升 EQ



Wednesday, 30 October 2013

My Own Private Central。IFC 的門裡門外


周日中環的風景,IFC 的門裡。。。


同一地點,上星期。。。

IFC 門外,兩個星期都一樣。。。

為什麼這麼晚還貼文?因為很晚才下班,因為晚,更要敷面膜。。。所以。。。半睡半醒 sleepwalking 中貼篇文!




Tuesday, 29 October 2013

喺垃圾桶執錢


上星期五食完晏,飯腳 LL 話要去銀行入票,令 S 醒起有張票要入,但係左摷右摷,成個銀包同手袋都反轉,都搵唔到張票。

大拿拿成二千幾銀,係 M 早前去遊學團嘅餘額退款,如果唔見咗張票,要有關方面 cancel 原本果張再開另一張比 S 的話,非常麻煩!


於是果晚雖然半夜三更至返到屋企,都立刻搜尋張票嘅影蹤,但搵晒所有 possible 嘅地方,都係失望兼落空。思前想後,終於諗起早兩晚曾經執拾過書枱上嘅信件,掉咗一啲信封同過氣嘅單據等。。。

於是飛撲去垃圾桶搵。。。

Well,張支票真係原整無缺咁瞓咗喺個 rubbish bin 嘅一邊, 並冇被“揸摷”,一啲都唔似垃圾(當然啦,原本就唔係垃圾嘛),應該係呢排 S 工作忙到失晒暈,唔見咗個腦,執其他野時唔小心掉埋張支票!

好彩只係掉咗喺睡房套廁裡嘅垃圾桶,平常唔多垃圾,唔係日日執走,如果唔係,連想喺垃圾桶執返啲錢都 no way

奉勸大家,好攰或冇精神時,就算間房幾亂都好,千祈唔好“執野”丶更唔好掉垃圾!!!

後記:今晚又半夜三更至放工,由於時間關係,呢一篇,係星期日晚寫定嘅,只有最後呢一句,係而家寫嘅!

Goodnight!





Sunday, 27 October 2013

唔食又食。太湖 vs 陽澄湖大閘蟹


S 雖然好鍾意食大閘蟹,但因為想健康一點,今年開季以來都忍住口冇食過,但眼見踏入十月尾,“乸季”已經過去,如果再等,就成個 season 變成明日黃花,到時後悔莫及,結果都係忍唔住,趁住今日星期日,有時間去買蟹,一於食返一餐至算。


落到去鋪頭,發現今年有齊太湖同陽澄湖蟹(見圖藍白色繩同有標籤果啲),S 記得上年食咗好多餐,都喺同一間鋪頭買,好似都係只食過太湖,同鋪頭職員 double check,佢都話舊年有一段時間只有太湖蟹。

睇睇啲價錢,陽澄湖出產比太湖貴大約 12 15﹪(愈大隻價錢相差反而少咗),由於兩個湖嘅蟹都分別食過,而大部份時間食太湖嘅都覺得 okay,但嘅然有,當然都要食下陽澄湖,於是兩樣都買咗,每樣食一隻試試。。。

哈哈,俗語有云,人比人丶比死人,原來蟹都係一樣,好彩先食太湖蟹,雖然都唔錯,但一食陽澄湖果隻,太湖蟹立刻被比下去!後者啲膏唔止更多更香,而且香得嚟甜啲,入口更有質感,好好味,果 15% premium,值!尤其是因為呢啲野唔可以食太多,所謂貴精不貴多,下次有的話,一定食陽澄湖!

相關網誌:食在屋企。陽澄湖大閘蟹(2015)





Saturday, 26 October 2013

嘩,好彩今日個 look 出得街!


雖然尋日返工朝 9 11,之後重去咗 join 美女組宵夜(其實應該係 10月之星生日 dinner,不過 S 遲大到,大家已食完,S 變咗宵夜!),今早,雖然唔係大清早,又去行路運動,吸收一下太陽伯伯嘅精華。。。

一落樓,撞到完全唔相熟嘅舊同事,大家打個招呼,又繼續上路。去到平台,行咗一陣,喺離 children playground 附近,見到一個男人攞住枝巨型白色大鏡頭喺度影小朋友玩,嘩,枝鏡 pro 過體育記者呀!睇真啲,原來係舊同事 D,再向近附望下,果然見到佢太太 SL,“玩影相”嘅人果然“眼利”,唔夠兩秒已經發現離佢地都幾遠嘅 SS 於是同佢地揮手,D 即刻用佢枝 professional 鏡頭向住 S。。。

D 笑說:幫你影返幅。。。

S 耍手擰頭咁話:唔駛影我啦,影你啲女啦。。。

可能 S 個樣好滑稽,D SL 大笑,S 又笑埋一份。。。

S:我計緊時,bye bye 。。。

於是繼續 S 嘅行路 workout,行完兩個圈,再經 children playgroundD 同 SL 一家已經走咗,S 唔記得咗問佢地一個次次撞到都想問但又冇問嘅問題!唔緊要,下次見到記住問啦咁。

Workout 完回家時,又喺 lift 內玩自拍,Okay 吖,好彩今日個 look 出得街丶見得人。。。






Thursday, 24 October 2013

又撐王維基


上一章提到唔撐王維基,其實係唔撐又撐至啱,點解?


就算王生只係時勢造出來的“副產品英雄”,都要先有佢嘅堅持同 passion,走去挑戰已被壟斷嘅市場,至會出現今日嘅局面。所以,S 其實喺早幾日,已經身體力行,買入咗香港電視(1137)嘅股票。

雖然有股評人話佢有被“陰乾”的危機,但 S 睇過一啲資料,香港電視除咗有個敢於創新丶堅持又有魄力嘅領導人之外,亦有實質資產,雖然業務方面因為個牌照會有變數,但現在的股價比資產淨值低,手上亦有唔少可以掉動嘅資金,從純商業角度,萬一真係冇個電視牌,自然“此處不留人,自有留人處”,所以 S 相信佢仍然係間“有可為”的公司。

另一方面,雖然而家攞唔攞到個免費電視牌照成疑,司法覆核亦動輒拖幾年,但 S 相信香港嘅制度,會有一個公平嘅結果,如果萬一香港嘅制度真係已死,S 投資落去嘅錢,比起呀王生已經“燒”咗果九億,只係九牛一毛,唯有當比錢買個“真相”,就係香港已死!

註:此部落格只屬於 S 表達個人無聊小想法的平台,以上絕非股票評論,亦非投資意見。



Wednesday, 23 October 2013

唔係撐王維基


香港人,又一次喺關鍵時刻表現出優良嘅質素,早兩日好多人因為免費電視牌照一事上街遊行,但最“正”嘅係,大部份人行出來嘅原因係要維護個制度,要求政府以制度同道理服人,而唔係因為“撐”王維基個人。


唔知政府聽唔聽到,大部份人雖然同情王維基,但佢地行出嚟,係要維護香港嘅核心價值,就係公開同透明嘅制度,而唔係一人獨大丶或者個人崇拜!

雖然 S 早兩日都寫過,因為呢件事開始對王維基“有感覺”,但覺得某程度上王喺呢件事只係一個“導火線”,將英狼特首嘅蠻不講理,嘗試扼殺香港嘅制度同核心價值嘅意圖引發出嚟!

而呢件事亦間接體現咗,“英雄”原來真係時勢造出嚟嘅丶甚至只係“副產品”,皆因 S 到現在仍相信,王維基當初攪電視台嘅主因應該係做生意賺錢,有可能連佢自己都估唔到,無端端變咗維護公義嘅正義朋友!

希望政府快快“回頭是岸”,用道理同制度還返一個牌照或“死因”比香港市民!

下一節:又撐王維基





Tuesday, 22 October 2013

冇諗過保養期都未過就壞囉!


今日終於攞個香薰座去 Oregon Scientific 度整,事緣係上年十二月至買嘅野,用咗唔夠半年就唔 work,以為只係個 remote control 冇電,點知換咗電之後繼續唔 work,一直冇心機攞去整,直至早兩日知道可以攞去 IFC 間分店就可以,既然喺公司附近,今日就到 IFC 一遊,向 sales 姐姐講咗以上嘅背境之後。。。

Sales 姐姐:你有冇帶果張保養咭?

S:冇喎,有咭嘅咩,喺邊度搵?

Sales 姐姐:係呀,應該係跟個盒裡面。

S:咁唔駛搵喇,我應該“dum”咗。。。

Sales 姐姐:咁要當冇保養咁 charge。。。(一邊講,一邊“落薄”)

S:我買咗唔夠一年,已經壞咗幾個月,你 check check lot no. 都應該知件貨有幾新啦!

Sales 姐姐:呢個唔準確,confirm 唔到係幾時出廠或賣出。。。

S:嘅然你地啲 policy straightokay 啦,你 quote 個價比我,如果我整就跟冇保養,但重點係你地啲香薰座唔係平(盛惠 $1,398!但有折),我完全冇諗過連保養期都未過就壞囉,我最近買咗個二佰零蚊嘅都幾好用。。。如果係咁,I wanna make a formal complaint about the product quality,我知唔關你事,但我唔會再買你地啲野。。。

(省下以下幾十字。。。唔係呀話,你估買緊雪櫃丶洗衣機丶車丶電視又或者 Macbook Pro丶貴相機果啲“大件野”咩?買個香薰座都要煞有介事咁攪保養,S 冇咁得閒耶,因為真係誓估唔到咁化學吖嘛!另外,平果個當然冇咁靚,但勝在平得嚟夠實用,價錢只係四份一咋!)

Sales 姐姐:咁我 check 吓先。。。

S:不如你 check 咗發生乜事先,最好只係好似我諗咁,只係個電池唔 work 啦!

Sales 姐姐於是攪咗一大餐,結果証實真係只係粒電池唔 work,但言下之意 S 換的“新電池” quality 唔夠好(S 當然唔 like,因為 S 發現家裡 quality 絕對冇問題果隻 Apple mouse,唔係所有牌子嘅 2A 電都用得到,有個尚好嘅 alkaline 電芯就唔work,反而平啲嘅 2A 電又 work)。。。於是 S 查問。。。

S:你地原本跟機果粒電池,應該用到幾耐?

Sales 姐姐:應該 8 12 個月。。。

S:跟我果座嚟果粒唔夠半年就死咗!

Sales 姐姐:咁你都可以放低架機比我地 check check。。。

S:唔駛啦,我唔鍾意嘥時間丶又要行嚟行去,你而家比過粒嚟,我唔比錢架,唔係幾錢嘅問題。。。如果佢又唔 work 我至再攞嚟整啦,by the way,我應該預佢用到幾耐?

Sales 姐姐:都係 8 12 個月。。。

OkayS mark 低佢,是日 2013 10 21 日,睇下“舊”新電池用到幾耐!

hmm... 但諗諗吓,今次未必可以作準,因為已經買咗個又平又正嘅“保濕機”,呢個會用少咗,理應“舊”電會“長命”啲,Okay,比個機會佢,睇吓點!





Sunday, 20 October 2013

留住夕陽 by GF6


星期天,早上起床沒有像昨天一般去運動,而是如周日一般去上班,不同的是,星期天上班,當然不會熬至晚上,速速完成最 urgent 那些,便下班去,離開辦公室才三時不夠,但還未吃午飯,極速回家,幸好廚神母親今天沒節目,替 S 預備了簡單的即食水餃。。。世上只有媽媽好,好味!

慢條斯理吃過“午飯”,無所事事,坐在窗前看風景,享受一下看海的日子,初秋時份,四時多的斜陽並不太猛烈,還頗漂亮,可惜 S 很睏,在沙發上睡着了,還把窗簾都拉上!

因為有其他事情要辦,小睡了不太久便“起床”,但捨不得醉人夕陽美景,移師睡房,把原本半開的窗簾完全打開,“攤屍“在床上繼續看海的日子,待了一會終於忍不住,把新相機拿來(按此閱讀),替 S 留住書桌前這迷人景色,其實 S 常常於晚上對着這海景寫 blog,但極少有機會欣賞無限好的夕陽。。。

交替嘗試兩種不同預設場景“浪漫夕陽”(以下以紫調為主色那幾幅)和“夕陽餘輝”,前者有點假,但紫色主調,果然夠浪漫;後者比較自然,兩者皆喜歡。。。











Saturday, 19 October 2013

跑先換對鞋。My New Balance


New Balance S 而言,係 M 小學時買比佢著嘅波鞋,唔算等別鍾意,只不過係 just another choice of sport shoes brand

點知呢一兩年 New Balance 爆紅,好似話係當年 Apple 教主 Steve Jobs 都著掛,潮人個個最少腳踏一對,但一向自我嘅 S,並冇跟風,一直冇買亦冇打算買,直至上星期,因為要 replace 果對已經著咗 n 年嚟打波同“跑步”(其實係行路)嘅 Reebok,想起成世都未潮過丶重鬼咁知慳識儉嘅老朋友都話跑步只著 Mizuno New Balance,於是。。。


S:我買咗對 New Balance

老朋友:好吖,好著呀。

S:好貴吓。。。我買嚟“行路”。。。

老朋友:咁買對平平地,三四佰算啦。

S:冇啲咁嘅野(價錢)喎,你果對都七佰幾啦!同埋你唔比我行行吓又想跑吓咩?

老朋友:咁買對好啲架囉,不過橫掂你唔係跑得勁,唔駛買果啲專愛嚟跑步嘅款啦。。。

S:就係果啲“行街”鞋至貴呀,成千幾銀,所以我揀咗對步跑 series 嘅。

今朝早同對跑鞋“開封”,哈哈,真係幾好著,個底果然墊得對腳好舒服,而且非常輕,唔怪古語有云「工欲善其事,必先利其器」,Okay ,S 一於,跑先換對鞋!

同場加映,自戀系列,今日跑完返屋企時嘅自拍靚樣。。。





Thursday, 17 October 2013

王維基


因為免費電視牌照一役,王維基成為“洗版”頭條人物。

蘋果日報圖片

S 和大多數人一樣,從 IDD 1666 開始認識王維基這名字, 那些年,S 剛回港,由於在外地住了一段日子,“享受”慣了比香港平宜得多的長途電話,正值當年王維基把“回撥式長途電話”引入香港,因而令長途電話服務費大幅下降,S 毫不猶疑便轉用了 1666 服務,雖然他們因為控制成本,沒有固定的零售店,但 S didn’t care,因為長途電話最重要的是能夠打電話!

繼打斷 001 IDD 的壟斷地位之後,又成功搶佔寬頻市場,再一次“破壞”電盈的好事,S 只知道王是個佰份佰“出位”的生意人,擁有驚人的創意丶鬥心和賺錢能力!

雖然如此,S 一直對王沒有什麼感覺,算不上喜歡,但又不反感。

然而,今次免費電視牌照事件,令 S 覺得王是個頗有趣的人,雖然他在大部份面對鏡頭的時間都盡量表現冷靜,但話說他在員工大會上忍不住流下男兒淚,而且表示不會參與遊行的原因是自己是個 emotional 的人,現在面要“冷靜”地“沉着應戰”等等。。。

這些把王感性和率性的一面表露無遺!

雖然 S 相信王當初進軍免費電視行業,應該是為了做生意和賺錢,但那種全身投入的 passion (賣掉城市電訊把資金完全投入攪電視而沒有 “Plan B”),和今次面對逆境的表現,S 終於開始對他“有感覺”!

希望除了和政府打官司,討回一個“公道”之外,王找到其他出路,繼續發揮他的 destructive creativity,為大家帶來更多更平宜的服務。



Related Posts with Thumbnails