Sunday, 19 January 2014

To 怪獸家長:執波,係一種資格


今日朝早因為有其他事做,冇去做 walking workout,下晝睇完醫生先係三點幾,趁天氣好仍有日光暖笠笠,又到屋苑平台行路兼做 stretching exercise,路過網球場時,見到有教練教緊兩個小朋友打網球,但地上面並冇網球“散落一地”嘅教波情景。

再望真啲,原來因為有個菲容姐姐做“球童”,小朋友一面打波,球童一面執波。S 明白,一定係怪獸家長想出嚟嘅“好橋”,為咗盡量“善用”比咗錢嘅時間,maximize 教波嘅時間,於是叫個球童喺小主人一面打波嘅時候,一面執返晒啲波。


S 有另一種睇法。S 上過一班十幾人嘅網球班,亦請過教練私人教導 S 一家三口,都係要自己執波嘅,因為“執波”係打網球嘅一部份,記得教練講過,想知道一個小朋友對打網球有冇 passion,觀察下佢會唔會去“追波”就知道,一個小朋友,如果連追住個波執返嚟打嘅 passion 都冇,重會有幾鍾意打吖!學識都嘥氣,不如將啲時間用嚟學佢鍾意嘅野啦。

重有唔知怪獸家長知唔知,溫布頓網球比賽每年都招務“執波仔”,如果規例冇改變嘅話,只招收十六歲嘅少男丶少女做,據 S 所知,果班少男少女,個個打網球都有返咁上下水準,亦要熟悉球例,絕對唔係“阿茂阿壽”都做得,而係一種資格嚟架!記得當年有個 London 同事,話比 S 知佢曾經做過溫布頓“執波女”時,佢面上泛起一陣驕傲嘅喜脫,S 好羨慕佢有機會見過 Grand Slam 嘅“大場面”呀!

Sighed!香港除咗有最多小朋友識彈琴但家長唔識音樂之外,應該係都有唔少仔女識打波丶但家長連個波係乜都唔知嘅地方!

2 comments:

m. said...

叫埋工人姐姐執波!真係諗到無諗過。。怪獸到離哂譜。。。

S said...

m. 我都諗唔到,所以要影低佢,如果唔係都幾難人人信!

Related Posts with Thumbnails