Wednesday, 12 March 2014

好友游詩“再別威尼斯”


blog 兩晚,皆因無端端又感冒,先來星期一晚急性失聲兼周身骨痛,尋日雖然出唔到聲咁濟,但有唔想改期嘅工作於是"唔信邪"如常返工,但不信不信還需信,尋晚放工去睇醫生,至知呢排好多人感冒兼失聲,啲惡菌周圍都係,食過藥九時多便睡,今朝一覺醒來已是中午,食過藥換衫落街食野,攝氏 19 度,著住羽絨竟然唔覺凍!之後又繼續瞓,醒來已經天黑,廿四小時裡瞓咗成二十個鐘。。。

成日冇留心睇過由 3個墟組成嘅美女 group chat,個 chat “如常運作”廿四小時不停 chat,大家留言叫 S 好好息之餘,是日最有意思嘅摘錄,非出自好友 C 和萬能主婦星星嘅"即興游詩"莫熟。

好友 C 近日獨自到歐洲工幹,最後一站來到威尼斯,雖然美景當前,但有感於每次出外工幹都是一個人在途上,到過歐洲多次竟然沒有一次是和自己愛的人前來,好不孤單!人在異鄉的 C "斯人獨憔悴"游詩興大發,即興作了以下游詩上半部,再由身處香港的萬能主婦星星修改及接了下半部,生動地道出一眾撐起半邊天美女的心聲。S 替好友作主貼在這裡,做個記錄

hmmm … 就叫“再別威尼斯”,哈哈,古有徐志摩嘅“再別康橋”,今有好友 C,以後萬一有腦退化症可以到此重溫。

上集。。。
朝朝返工似夢遊 似舊浮雲游呀游
老細把声伴左右 令我心驚又擔憂
做到發癲無息休  嘆茶食飯唔望有
日日返工人消瘦 星期日先唔駛愁

下集。。。
以為可以抖一抖 點知一早未瞓够
比班馬骝煩到嘔 家事家務無停手
長輩黎到忙應酬 買餸煮飯两頭走
天呀我想抖一抖 日日勞碌乜解救
工事家事望打救 辛苦自知不外求
煩事抛開莫強求 幸福家庭巳足够

Okay, 貼完這個,又係時候講 bye bye 去瞓覺,抖摟精神,明天又是新一天。

另,S 貼這個之時,好友 C 應該在從歐洲回家的航班上,祝平安順利。

Goodnight!

No comments:

Related Posts with Thumbnails