Friday, 21 March 2014

係咪男人嚟架!


連續病咗好多日,今日雖然終於開始好轉,但由於個人仍然好攰,連公司嘅春茗都冇去,準時放工返屋企休息。

返到屋企大廈大堂,前面有位老人家,望落就算冇八十歲都最少七十幾,行動比較緩慢,而且好似要好費勁至拉得住大堂果度都幾厚嘅玻璃大門,S 喺佢大概兩個身位之後,申手拉住度大門,一心等老人家入完 lift lobby S 至行。點知呢個時候,喺 S 後面果個著住整齊西裝丶一幅“返工 look”嘅男人,望咗 S 一眼,有啲唔耐煩咁樣,想喺 S 身邊攝入過去。。。

火都嚟。。。心諗:係咪要推跌佢(老伯)至安樂吖!

不過,S 冇望個男人,亦冇同佢講野,更冇表現任何情緒出來,而係洗出更“高”嘅一招,就係當個男人透明,雙眼只望向原本 focus 嘅方向,make sure 阿伯入到去 lift lobby,而身體亦一樣保持原本嘅方向,冇意途去“擋開”或閃避個男人,只係心想,有 guts 你可以撞埋嚟。。。

當然,個男人冇夾硬“打尖”,但見 S 當佢透明,佢依然行喺 S 側後方,即係冇完全退返去後面,S 冇理佢,一於如常跟住老伯後面,而個男人就“亦步亦趨”咁跟住 S 入去。好鬼乞人憎!

其實,話晒一場街坊,如果佢趕時間,大可以有禮貌(註:係要有禮貌,而唔係唔耐煩)地講聲“唔該”,S 有乜好意思唔讓佢吖,慢都只係慢果一丶兩秒鐘,不過一幅“老馮”要人比佢行先嘅態度, Sorry 喎,S 睇你唔到囉!

S 有時會諗,到底啲咁小家嘅男人,對住自己嘅女朋友或老婆會點嘅呢。。。

哈哈,S 唔會天真地以為呢種男人會“一視同仁”唔讓自己嘅女人,反而多數會係,要全世界都讓佢嘅“公主”或“女皇”行先嘅。。。門口“汪汪”囉!

註:S 只係講緊今日撞到嘅麻煩友,萬一有人睇完上文想覺得有擂同或“對號入坐”,唔好意思,S 絕無影射意思,閣下可能諗多咗。

祝大家周末愉快,S 早日康復!


. 

No comments:

Related Posts with Thumbnails