Saturday, 26 April 2014

OMG!蘇局長的包容論


最近 S blog 大部份時間都寫吃喝玩樂,其實 S 仍然好留心時事,有唔少 topics 想發表下自己嘅無聊小想法,只不過,數碼時代嘅步伐,啲 topics 唔止轉得快,好多時連是非黑白都愈嚟愈模糊,有時真係唔知點寫好!

但尋日呀蘇局長嘅“包容論”,實在太出位,點都要趁吓熱鬧寫返篇。


話說 S 一向對自由行來港購物其實冇乜大意見,原因其一係,凡事總有兩面,迫爆香港確實係一個問題,但帶動消費事實亦有其好處。其二,S 唔想五十步笑佰步,因為由 n 年前嘅移民潮開始,香港人自己都係水客大戶,住喺美丶加嘅朋友,返香港不時大手運啲喺美加買平過香港嘅物品,古靈精怪,無奇不有,由衫褲鞋襪丶健康食品丶到狗糧甚至漱口水,S 都有朋友從外地“運”返港,係用“運”字來容形!而住喺歐洲嘅,就運名牌手袋,S 甚至有朋友本身唔係住歐洲而係住香港,以前參加過專替人往法國“掃” LV 嘅“水貨團”。

講真,呢啲野,香港人自己做唔少,除此之外,香港人都不時喺外地以廣東話大大聲自說自話,唔係所有外國人都適應到嘅,但唔少人都“包容”到,因為買野同講野大聲,買完丶講完就走,始終對其他人嘅影響有限。

只不過,S 好相信丶亦好有信心,香港人唔會周街大小二便囉!呢樣野,同買野丶講野,完全係兩回事,隨街大小便涉及到公德同衛生問題,啲排涉物(講白啲“屎屎尿尿”)如果唔係會有衛生問題,就唔會有“廁所”呢個文明嘅發明啦,而且,如果自由行唔覺得隨街大小二便有問題,又怕乜比人影呢?正如 S 執得個樣好地地果日,出街唔怕唔覺易比遊客影咗入相內做“報景板” 咁囉!

S 自己都做過細路仔,而家亦係家長,明白要學識“忍一忍”唔係一時三刻即刻學曉嘅,但係,香港嘅公共洗手間並唔算太過少,尤其是自由行鍾意去購物嘅地區,唔少係旺區又有大型商場,只要肯行多幾步,唔會冇廁所囉!眼見最近唔少比人影到或報出嚟嘅便溺個案,都唔係喺“山卡啦”發生嘅,咁嘅行為,實在唔應該鼓勵耶!

但可惜,呀蘇局長唔止唔勸導果啲人唔好做影響公共衛生嘅行為,反而重叫香港人包容丶以和為貴!到底佢知唔知,“包容”係建基於文明同理性,互相尊重不同嘅睇法或行為,但對一啲本身就唔啱嘅事都尤得佢,係叫“縱容”!重講埋乜野“以和為貴”,S 以為睇緊黑社會電影添!!

局長咁都唔識分,唔怪得網民叫佢比自由行同胞們去佢自己屋企“便便”先,等局長“以身作則”身體力行地話比香港人知如何去“包容”!!

唔該晒呀蘇局長!

No comments:

Related Posts with Thumbnails