Monday, 16 June 2014

點樣可以“繼續靚”?


早前讀了「人在中環」 CK 那篇「繼續靚」,令 S 有點不惑,皆因身邊的女性朋友之中,從來只有仍然係單身(未婚或離婚,總之係單身)果啲,至會擔心自己仲有冇“市場”。已婚或者已有孩子果啲,好少會擔心“市場”呢回事。

可能係因為物以類聚,S 認識嘅朋友,都算係“有要求”之人,就算唔係天生美若天仙,但都相信世上冇醜嘅女人,只有懶嘅女人,所以大部份都會 keep 住保養自己,而活到咁上下年紀,“保養”,並唔等於只係外表,雖然基本護膚少不得,但更重要係從不同途徑,例如嗜好丶健康丶養生各方提升自己嘅修養。

因為“靚”,其實從心同健康出發,皆因相由心生嘛!

其實,CK 篇文寫了一個好重要嘅 point,就係男人自己都會老,無論原本幾型幾靚仔,同女人一樣,經過歲月洗禮,一樣會走樣,當然,男人比女人幸福嘅係,大部份人唔 care 佢地臉上嘅縐紋,重覺得係成熟嘅 “blessing”,如果係咁,就請佢拿出“成熟”來,欣賞一下陪住佢一齊變老嘅身邊人,如果連呢樣野都做唔到嘅男人,根本唔洗煩,因為倒不如走得比佢早,等佢“擔心”好過自己“擔心”耶!

S 覺得,會在生細路之後“擔心”自己“市場”嘅女人,一係過份地“放大”婚姻佔人生嘅比例,一係對自己冇信心,但最可能嘅係,對身邊果個人冇信心,如果唔係,只要做返自己,幾時都最靚!!


. 

2 comments:

Ebenezer said...

對男人來講,靚反為客易(肯勤力執拾下,點都唔會太差),反而型先係難,因為這關乎於氣質內涵。

對女人來講,何嘗又不是?

S said...

哈哈,咁又係呀!

Related Posts with Thumbnails