Friday, 27 June 2014

牌品好丶人品好


晚飯後,一邊“嘆”新品種嘅金奇異果 “charm”(認住呢個標籤),清甜又好味!

一邊看電視,轉到電影台,發現重睇咗 n 次嘅「嚦咕嚦咕新年財」,唔單止冇轉台,仲叫埋 M 一齊睇,因為此電影堪稱 M 的“飲戲”,以前試過錄低咗,M 不斷重睇,令 S 一怒之下 delete 咗佢。

套戲好睇之處,除咗因為夠晒娛樂性之外,重好發人深醒,而其中最有意思果樣,當然係“牌品好丶人品自然好”。

同唔少香港人一樣,S 自小喺麻將聲中長大,小學時已經從企喺麻將枱傍邊睇大人打牌,從而自己學識,到咗中學,同學之間其中一種 social 活動,就係到唔同人屋企打麻將。

S 雖然識打牌,但從來冇耐性坐得耐,因此對於要一坐低就最少打 4 圈呢種活動,其實冇乜興趣。所以好明白,點解牌品好,人品自然會好。皆因可以坐喺度打牌打得耐,而輸(唔一定係錢,但總之係輸)果時重可以沉住道氣唔發爛渣嘅人,人品同 EQ 自然有返咁上下!

所以,中國人講得啱,外母揀女婿,最好從麻將枱上揀!

S 自己,牌品又點呢?

哈哈,呢樣冇乜人有機會見証,皆因 S 自知冇耐性,只會打一陣或者“鄧”腳,極少挑戰“長途賽”,所以連識咗 S n 年嘅美女好友們,都唔清楚 S 嘅牌品耶!

講返套戲,除咗牌品之外,S 最鍾意果場係,劉德華最後果鋪唔開牌,凡事留一線,唔止日後好相見,話唔定下一世更有福!



. 

1 comment:

新鮮人 said...

國粹。

予娛樂,人格鍛鍊,人生道理於一身。

Related Posts with Thumbnails