Sunday, 6 July 2014

芝士蛋榚,點解要整心形?


天時暑熱,今日家中各人都有節目,S 一個人在家開了冷氣走入熱廚房,嘗試自己整 cheese cake。。。

S 係佰份佰新手,所以係根據網上 Christine Recipes 的做法,如有興趣知道詳情請按此閱讀。這篇只係想將 S 自己做嘅過程同“蝦碌”做個記錄。。。

上次同朋友一齊整,唔知係咪因為冇落塔塔粉同檸檬皮,雖然個蛋榚外表好靚丶味道亦 ok,但裡面底層“發唔起”,個蛋榚分成兩層,下層 texture 有小小似“燉蛋”,好攪笑。

好友 JC 提議兩樣野,第一,加返塔塔粉,份量雖然少,但佢嘅化學作用不可小覷;第二,由於 S 的焗爐比較小型,溫度可能唔夠,所以可以自行因應情形加高溫度(例如用 170 度開始),等啲材料冇機會“沉澱”, 快啲“發起”,發到咁上下至調返低(自己執生)。


Okay,今次加返塔塔粉,但依然冇落檸檬皮,因為買唔到檸檬!另外,亦都調高咗溫度大概 10度至 160 度,但因為整時唔記得咗 JC 提議嘅原因,唔敢用太高溫。


結果,個蛋榚好靚又好香,裡面嘅 texture 比上次改善咗,冇分成兩層,但仍然係比較“濕”,只有最頂果部份至夠鬆,但整體好滑漏!

S M 急不及待一人食咗一件做下午茶,之後,“蝦碌”來了。。。

S 不單止冇細閱食譜最後果段話要放入雪櫃冷藏,重用一個蓋蓋住個蛋榚,荒食比“小強”偷食,點知隔咗只係一陣,啲倒汗蒸氣整到個頂都“林”咗!簡直係前功盡廢!>_<

不過唔緊要,S 重有夠做多一個嘅才料,下次再接再勵!

咁寫咗咁多廢話,究竟點解整心形呢?

除咗靚啲丶浪漫啲呢啲虛蕪飄渺嘅原因之外,實情係,圓形蛋榚盤賣 $65,心形只需 $56。。。

哈哈,慳家嘅 S,自然識揀啦!


. 

3 comments:

新鮮人 said...

心形仲正,
夠浪漫!

Ebenezer said...

做心形蛋糕,可以唔洗落咁多糖,因為會好 sweet sweet^^

Armadillo said...

個樣好靚,就算唔食得都睇得先啦!仲有,睇到「S 同 M」,忽然聯想起另一啲嘢添。哈哈,我心邪,自摑一下!

Related Posts with Thumbnails