Tuesday, 14 July 2015

Starbucks Tumblur x 剪絲陳皮

S 氣管比較弱,每隔一段時間,總會咳漱不停,去年老朋友相贈了一些差不多二十年的陳年陳皮給 S,這種年份的陳皮,很珍貴,得來不易,S 珍而重之,分了兩份,一些留在辦公室,一部份帶了回家,並不會用作日常煮食,只在“有需要時”才焗來喝。

後來相識多年的 MY,發現 S 咳漱的問題,也相贈了一些已經歷了十多個寒暑的自家製陳皮給 S,最近感冒痊癒之後,寒咳卻欲斷難斷,由於並不嚴重,S 不願意再見醫生,於是又是朋友們相贈的“保品”出場的時候,上星期,喝了老朋友給 S 放在家裡的最後一片。

剛過去的周末,MY 送贈的終於被開封,第一次用茶水間嬸嬸提議的方法,把陳皮剪成絲狀,才沖水喝。。。

Well,也許是剪成絲狀之後,增加了 surface area,加速了陳皮溶化的速度,甫用熱沖下去,已經可以聞到陣陣香味!配以 Starbucks 透明的 tumblur 來焗,中西合壁 cross over,還可以觀察到陳皮和水色的變化,有趣,有得喝又有得玩!

細問之下,MY 送贈給 S 的陳皮,原來出自她奶奶的心機,除了謝過 MY,也謝謝“伯有”!

還有,當然也要謝謝老朋友,S 不但喝過他贈的陳皮,更喝過他親自燉的的石斛,溫暖牌,好味又有益!


Friday, 10 July 2015

心裡的 Telephone Directory。乞人憎版

同表妹 D 講起一啲唔捨得換嘅野,話題偶然被扯到去細個時嘅屋企電話號碼,那些年,只有家居固網電話,手提電話仍然係占士邦 007 電影嘅“科幻”工具!

今時今日,大部份人已經改晒電話,或直情冇固網電話,就算有,都極少極少會打去屋企,只會用手機聯絡。但表妹舊居地址同電話號碼依然,因為 Uncle 一直冇搬過,S 腦裡即時浮現幾個“冧把”,傾咗一陣,終於忍唔住問。。。

S:係咪 。。。889 呀?

D:係呀。。。25xxx889,嘩你重記得呀?

S:其實。。。我成個冧把 xxx889 都記得,不過怕記錯,所以只講 889。。。

D:你啱呀,係 xxx889,果時港島 5 字頭,後來加喺前面,再後來又加埋 2 字,所以變成 25 …

S:係囉,果時得 6 個字,我自己個冧把都記得,我用 xxx612 1xxx889 搵你,哈哈。。。

D:我真係唔記得喇。。。

S:正常吖,我都唔知點解記得啲咁嘅野,我幾年前都寫過,記得晒細個時同學啲電話。。。

D:哈哈,係囉,你專係記埋呢啲無聊野。。。

S:我都唔知點解架,其實真係冇特登記,不過。。。

D:不過你真係冇“用力”記吖嘛,都冇“溫”過“書”就講得出。。。

S:哈哈,係呀,初時以為見到佢地 ‘click’ memory,但奇實,見唔到都噙出,例如小 S 4xxxx5F 7x7xxxxC 7x7xxxx :-P (鬼臉一個)。。。

D:你知唔知,其實你(記得啲咁耐嘅野)好乞人憎架,哈哈。。。

S:我知吖,但冇偈喎!

其實真係冇諗過要記住,不過,既然記得,又無需刻意忘記咁囉,反正有啲學說話,人嘅大腦有 95% 未開發,咁咪發揮下 idle memory 嘅作用囉!

祝大家周末愉快!

.
.

Sunday, 5 July 2015

冇貨?原來可以。。。

S 好少用飛行里數換機票,因為以前試過一次,覺得好麻煩,restriction 又多,又限住日子,又要一早 book,所以都係用啲分嚟換吓啲無聊玩具,以前換過 Panasonic lumix 相機,又換過 ipod (第一代),同埋一啲唔駛咁多分嘅小玩具,都幾好。

近年飛少咗或買 travel package,分數並唔多,原本諗住留啲嚟下次飛長途 up-grade,但有少量分數就到期,於是最近換咗個 OSIM 按摩眼罩嚟試吓,早幾日收到 redemption letter,今日順路經過德福商場,諗住去 redeem。。。

職員 A:呢度冇貨喎,你遲啲再嚟啦。。。

S:我順路經過至嚟呢間攞,未必會再嚟,我原本諗住去又一城。。。

職員 A:我地呢度冇晒,你應該打個電話問嚟吓有冇先。。。

S:吓,我唔會知你冇貨喎,你問吓果度(又一城)有冇啦。。。

職員 (唔知邊個職員) 好唔願意咁打電話比又一城分店。。。

職員 B:佢地都冇晒,其實應該其他都冇,你應該打個電話嚟吓有冇先。。。

又係呢句!

S 開始火火地:我唔喺你公司做,唔會知你冇貨,你地如果冇貨就應該 stop 咗個 redemption 唔好比人換,唔該唔好掉轉將個責任推落我度,咁邊度至有呀?

睇完電腦,其中一個職員:將軍澳應該有。。。

S:我唔會去果度喎,你有 5  間鋪,就係想客方便吖嘛!比得人換,你地應該要有貨,應該係你地嘅責任話比我知幾時有 。。。

職員 C 知道不妙,攞張紙出嚟,好好語氣咁話:你留人低聯絡電話,有貨我地通知你。。。

Sokay 啦,咁大概幾時有貨呀?

三個職員都唔識答,呢樣 S 明白,鋪面嘅員工未必知道幾時有返貨,原本情有可原,但有個實際問題。。。

S:封 redemption letter 有限期,到你有貨時,過咗期咁點呀?

職員 B:我地唔知幾時有。

S:我明呀,但咁點呀?如果你 9 月至有,到時我封信過咗期,即係冇得攞?

職員(唔知邊個):咁我而家收咗你封信先,出張我地公司嘅單比你,唔會過期嘅,寫明(件貨)未取,有貨時通知你。。。

S:即係點呀?

職員 A:即係我地而家就收你封信,咁就唔會過期都未 redeem,我要 check 你個 membership card。。。

職員 C:有我地公司出嘅單,萬一轉咗款,都會比返個相近嘅你。。。

S:哦。。。

於是攞張 membership card 比佢 check)

咁,即係根本一早就可以幫 S redeem,但啲職員一句冇貨就想打發 S,如果唔係 S 聽完佢地重覆話你應該打電話嚟問吓先而開始發火,就要自己記住得閒 check 吓有冇貨,如果佢過期都冇,但果頭又已經比 Marco Polo 扣咗分,到時咪好煩!

要知道,雖然呢個係 redemption gift,但 Marco Polo club 唔係冇比錢 OSIM,只係可能有 bulk purchase discount,所以呢個並唔係 free lunchS 亦冇佔 OSIM 便宜,咁嘅服務真係不知所謂!

其實,S 當時心中講緊“XY丶交义媽差緊佢地,不過既然已經有解決方法,費事失儀,慳返啖氣!

等候時問吓職員 C 如果攞張舊按摩椅嚟換張新椅,可以 trade 到幾多錢,職員 C 知道 S return customer,耐心解釋。。。呢個,令 S 覺得更不敢恭維!



Saturday, 4 July 2015

S 和男朋友有個約會(23)。夏季不再來



晚上離開辦公室時,忽然明白,病,是因為。。。

條街太熱,office 太凍!

前後拖了差不多兩星期,昨天終於止了咳,但今天輕微咳嗽又回來,有如寃魂,一直纏繞着 S ,不願散去。

懷念那些年, 夏天穿“的確涼”縫製的短袖校服裙,在沒有冷氣只有吊扇的課室,沒有空調的雙層巴士,也從沒有試過熱得全身冒汗。

學校以外,沒有多少大型商場,室外室內溫差沒有現在那麼恐佈,也不知是因為那時只因負擔不起,還是根本沒有需要,總之從來沒有想過夏季要用圍巾!

記不清是會考還是 A Level 那年,只記得是某個夏季,S 穿了一件樽領丶但沒有衣袖的背心上衣,在同一個試場考試的男同學問 S:你著樽領呀?

S 沒好氣的答道:背心嚟架!

是的,就是那些年,穿背心到試場考試,無需外衣,沒有圍巾,也從來不會怕因而“冷親”生病。

季節轉移,是年紀大了?身體虛弱了?還是夏季不再來。。。

後記,不知是否開始“腦退化”,感冒之後竟然想起多年前這種無聊又鎖碎的小事,但卻無論如何,無法想起以上“男同學”到底是那一位,要是有緣讀到這個,請自行對號入座!!



Related Posts with Thumbnails