Sunday, 21 February 2016

Stay Healthy until …

男朋友 K 回港過農曆新年,短短嘅幾星期,我地見咗 4 次面,冇乜特嘅活動或地方想去,只想見吓面,make sure 大家未死得,所以其中兩次諗唔到去邊,都係嚟 S 屋企,輕輕鬆鬆"吹吓水"、飲吓野,而咁啱兩次都係 S 生日的前夕(新曆和舊曆)。。。


S 新曆生日之前果晚,K 因為先同年老的父母共進晚餐後才來,到達時已經十一點幾,當時 S 為了小事一椿,正在“發脾四”,K 嚟到,正好緩和一吓。

删除之前一佰幾十字。。。

S:你個 friend 正“西人” 呀。。。(K 其實係 Mr. F 的老死,S 認識男朋友 K,全因 Mr. F,當年 K S 都在美國,重在同一個州,in-state 電話平過長途電話好多好多,有一段長日子,S K 講電話重多過同 Mr. F,所以 K S 無所不談)

K:咩“西人”?

S:即係“衰人”囉。。。

K:哈哈哈!Life is short, take it easy。。。

歡樂時光過得特別快,好似乜都冇做過,K 返到屋企已經凌晨 3 點幾,在 group chat 內報完平安,say goodnight 之後留咗呢句。。。

Enjoy each other as much as u can! 有今生未必有來世!

S 生日果日起床之後見到以上,又答咗 K 一輪無謂野。K 下晝到咗機場等入閘,再 chat 我地 say goodbye。。。

SStay healthy until we see each other again!

KSoon … Very soon!

大家之所以咁 sentimental,因為 K 幾年前“死過翻生”,成功跨過鬼門關,但差啲半身不遂,而家可以正正常常生活,活着嘅每一日,都係有賺,所以盡量唔會為小事而煩惱,只會珍惜當下嘅一切。

呢幾年,無論係親人丶朋友或同事,S 經歷咗唔少突如其來嘅“死別”,有啲重年輕就走,好難接受,所以每一次“生離”,都有啲驚,唔知會唔會係 last goodbye,希望大家身體健康。。。

說時遲那時快,S 都未寫完呢篇,K 已經從地球另一邊,傳來孖囡多謝 S 嘅利是的拜年訊息!

好意頭說話唔怕多,但願大家都 Stay Healthy until We Meet Again!

哈哈,剛想貼呢篇,又到男朋友 V 嚟探 S,好熱鬧呀 ^_^


 

Friday, 12 February 2016

珍惜拜年時

農曆新年,節目年年差不多,但年年又不同,差不多嘅係行程,唔同嘅係人物組合,年紀越大越明白,有啲人,一去會不返,每一次見面,都可能係最後一面,所以,S 極少在農曆新年期間出門,除了拜年,也可“留守”恭候一眾會回港過年的親戚好友。


今年又點過呢?哈哈,有如以上所講,同往年差唔多。。。

年初一。。。

因為同廚神媽咪住,冇乜地方要去,只係晚上返另一邊食晚飯,早上起身後就“榚來張口”,除咗蘿蔔榚之外,S 最鍾意食姑媽年年從印尼訂返嚟嘅“黃金榚”,之後換條靚裙,影吓全家福,跟住玩吓唔少得嘅新年玩意,一係“魚蝦蟹”丶一係“開枱”。。。係呀,S 屋企計埋 S 的廚神母親,都只得 4 個人,都會玩呢啲“嘈”吓間屋,等有啲生氣,今年揀咗開枱,反正平日唔會化晒裝丶換晒衫喺屋企影相丶打牌,新年就係最好時機做呢啲“騎呢”野!

打到咁上下,雖然 4 圈未打完,但係時候返男家,老人家早食飯,到食飯時候至返去,佢地都覺得晏嘅,所以 5 點零鐘就返到去,未到開飯時間,有乜好做?當然又係要“嘈嘈”佢啦,雖然 Mr. F 唔係獨生,但呢幾年都只得我地一家在港過年,陪吓老人家,雖然 S 其實冇耐性打麻雀,更唔 like 打一番起糊兼“陪銃”(即家家要比錢丶“全銃”的相反),但一年至打一次,老人家開心,是但啦!打完 4 圈丶食完飯,返到屋又同廚神母親繼續,完成原本打緊果 4 圈,完美結束年初一。

車尾箱“常滿”,裝滿帶去
姑姐屋企嘅野食丶拜年手信,
相機腳架等“架生”。。。:-P
年初二,行程緊密嘅一日。。。

先父果邊親戚團拜,先父走前都在 S 家團拜兼開年,但自 S 一家搬離舊居之後,現居唔夠地方 house 成三十人,幾年前移師 5 姑姐家舉行,今年好齊人,舊年離開咗香港去拜會其他長輩嘅表弟 K 同表姨生女 L 兩家,今年都返晒嚟;表弟 L 未婚妻舊年唔喺香港,今年又有嚟,重有好消息,拍拖經年,下年終於派行是,恭喜恭喜!重有舊年開始至加入團拜嘅姪仔 H 同佢太太;今年更特別嘅係自高中之後,好似冇一齊團拜過嘅表哥 SL,唔止人到,重帶埋個好 pro 嘅相機嚟影吓靚表姐同靚表妹;不過另一個表哥 Sing 因為太太要當值(返工),只能單身出席,雖然係咁,今年都有成 32 人,希望大家身體健康,年年再見!

由於 5 姑姐家在 S 舊居同一屋苑,所以 S 一家會順道去埋另外兩個舊街坊 (Mr. & Mrs.  T 同埋 K伯伯)丶重有住同一區嘅好友 R J 家拜年。。。

Mr. & Mrs. T S 一家好有緣,唔止喺舊居係街坊,佢地囝囝同新抱,就住在 S 現居同一屋苑另一座,雖然 S 搬走咗,都成日撞到囝同新抱,同佢地一家一直有聯絡,好多野搵佢地幫忙,母親同 Mrs. T 更是“飲茶腳”。另外係 K伯伯,當年 S 一家搬到果度,就住 K 伯伯隔離,佢睇住 M 出世丶先父去世丶到 M 而家十幾歲成個大人,S 亦睇住佢老去,雖然九十幾歲嘅 K 伯伯精神唔錯,但 K 伯有呢幾年變化就好大,唔係好行得,今年重患埋腦退化症,S 一家去到拜年,K 伯有明顯唔認得我地,只係點吓頭,到聽到 K 伯伯同我地傾偈時提起啲孫仔丶孫女至有少少反應,希望今年 K 伯伯同伯有都身體健康!

初二最後一站,係 RJ 屋企,曾經 RJ 家差唔多係 S 嘅另一個家,S 有佢地屋苑住戶証(而家都有),管理員認得 S 唔止因為 S 成日去,而係去親都係半夜,果啲時間冇乜人出入,所以當年 S 雖然唔係業主,但管理員們叫得出我地。近年因為 RJ 忙於湊仔(女),S 少咗去佢地屋企 hea,但每年初二,“指定動作”係 S 一家去佢地度拜年丶食榚(J 親自整嘅榚),同埋影全家福,因為 J 每逢佳節都好有心機佈置屋企,今年成為 3  子(女)之母亦唔例外,而更重要嘅係,勇敢地生埋第 3 個,依然 keep 靚靚兼入得廚房,梗係要影低佢啦!

Well,原來 S 真係幾長氣,寫咗咁長至記錄咗兩日, Okay,寫住咁多先。

雖然寫這個之時已經係年初五,祝大家猴年順順利利,萬事勝意!


Related Posts with Thumbnails