Monday, 20 June 2016

BB 班行 BB 山(2)。大棠遇見蛇


自從行過元荃古道見識過香港景色另一種美之後,趁住未完全進入炎夏,再去行咗幾條入門路線,好好玩,陸續會分享。但今日先寫昨日的旅程。。。

2016年6月18日,大欖涌水塘

618日,星期六,起點,大棠大欖郊野公園,沿大棠山道行至大欖涌水塘尖折返,回程時經伯公坳,再經之前同一段大棠山道回到起點。

由於大家都在午飯前要返到元朗各自有事要辦,大約 8 點半到大棠,一如之前兩次,都係車泊最接近大棠山道的停車場,由於今次並非追葉季節(註:有興讀追葉請讀文末的相關網誌),而且天氣已經開始熱,並唔多人,但呢個正合 S 心水!


大棠山道即係追紅葉嘅必經之路,條路鋪得好好,可能因為秋冬人流極多,沿途都見到中電嘅工程,鋪電路,唔通未來會起路燈? God knows

正如行山高手 Mr. KC 所講,完全冇難度,於是有時間預習一下紅葉課,睇定邊啲係“目標”,到時候如果再來,有個概念,雖然未到季節,疏疏落落有幾塊樹葉已經開始變色,可能年紀大,身體麻麻,要比其他葉早走一程。。。


到達水塘尖,有一片小草地,好舒服,係尚佳嘅歇息地方,但冇影相,因為我地遇上 230 個單車人仕一齊休息,點影都有人,所以索性唔影片草地,但一邊休息,一邊欣賞優美嘅湖光山色(此文章第一幅相),有點難以相信置身於香港!

由於時間關係,我地在此原路折返,行到咁上下,跟着伯公坳路牌指示,會匯合返大棠山道返回原來的起點。今次的路線應該係麥理浩徑第 9 10 段其中一小節,話說可以和上次行的元荃古道連接,路牌做得幾清晰,並唔難搵。往伯公坳途經嘅雖然係山路,但都幾易行,不過,千祈唔可以因為容易就掉以輕心,因為,我地就係喺呢段山路遇見蛇。。。好彩行頭的 Mr. C 警覺性高,聽到啲樹葉聲停低腳步,結果條蛇喺同我地距離只有 34 嘅山跛擦身而過,嚇死人!如果萬一踩咗條蛇度,不得了,因為據 S 嘅目測,條蛇大概 5 6 呎長,唔識咩種,但最驚有毒,S 見到時,真係好驚,所以當然唔得閒影相啦!免得手忙腳亂出意外,跌電話事小,萬一跌落山就大件事!




雖然 Mr. KC 形容為有點悶的路程,但就啱晒 S 呢種超級 BB 班!

相關網誌:

Friday, 17 June 2016

BB 班行 BB 山。元荃古道

行山係好多香港人喜愛嘅活動,不過,對於住過新界大西北十幾年嘅 S 嚟講,係新鮮嘅活動。

話說出來做事初期,有啲同事不時會組織去行山,但佢地去嘅都係有返咁上下難度嘅路線,體力係有限公司又冇經驗嘅 S,唔想成為大家嘅負累,冇參加過。

直至而家老咗,覺得真係要多做有益身心嘅活動去保持身體健康,遇上亦算係行山初班嘅男朋友 Mr. C,唔介意遷就 S 呢種超級 BB 班,於是今年 4 月,春末初夏,趁天氣未熱,終於踏出第一步,去行元荃古道。。。

點知,去到簡直有被賣豬仔嘅感覺,因為果條又長丶又斜丶又多梯級嘅樓梯,真係見到都有啲驚呀!不過,一場嚟到,冇理由未出發先返屋企㗎,都行吓啦,最多慢慢行,行幾耐就幾耐啦。。。
2016 年 4 月9 日,元荃古道

未上完條樓梯,Mr. F 主動 offer S 揹埋 S 嘅背嚢,其實個背囊唔算重,因為冇帶啲無謂野,所以 S 覺得可以自己揹,並冇“求救”,但兩位男仕或者覺得,如果以 S 當時嘅速度,可能要行到天黑掛。有人揹背囊,可以更優悠地欣賞沿途風景,所以話,一如之前寫過“要嫁就嫁會替妳背相機的男人!”

千辛萬苦上完條樓梯,之後再上咗唔少斜路,霧氣漸濃,沿途經過石龍拱,身處四野完全冇樓又被春末霧氣濃罩嘅山頂,有如入咗無人嘅仙景,好震撼,S 從來冇想像過香港原來可以咁靚!完全明白,點解大家反對改變郊野公園用途!而且覺得,行覺幾辛苦,都係值得嘅。



在落山方向時,我地向一伯伯問路,原來伯伯係識途老馬,話如往深井想行山路可跟佢,於是唔識死嘅我地,跟住伯伯行,沿途同佢傾偈,始知伯伯係行山發燒友,話比老婆知出街買啲野,但原來一個人行咗嚟呢度!老當益壯嘅佢,行到咁上下,話往深井只得一條路,唔會盪失的,等唔到我地,佢自己走先!其實 S 覺得伯伯咁樣一個人行,有啲危險耶,不過果晚至之後幾日都冇關於行山人仕意外嘅新聞, no news is good news 啦!

沿住條山路,經過一條小溪澗(但唔洗行落條澗的),又經過一個叫清快塘嘅荷花塘,其時未係荷花盛開嘅季節,但是一歇息好地方,再向下往深井時,天色好返啲,終於見到青馬大橋,結果以網上介紹預計嗁時間 落到深井,Ok lah。。。


雖然呢一丶兩年都有做吓 walk / jogwall sit / 拉筋呢類“運動”,但始終唔行慣,攰咗幾日!

但想到有如天堂嘅景色,S 同自己講。。。 I’ll be back

下一節:BB 班行 BB 山(2)。大棠遇見蛇


Saturday, 4 June 2016

六四。二十七

不再會去維園,因為不再相信支聯會;也不會去學生攪的論壇,因為和他們想法不一樣,然而,S 不怪他們,反而在想,是誰令他們有如此的想法?

S 用自己的方法悼念,皆因悼念沒有專利!

毋忘八九丶六四


Related Posts with Thumbnails