Saturday, 29 April 2017

悲情柬埔寨


上星期去了吳哥窟走一趟,回來後。。。

S:其實去睇吓啲古蹟同環境,都可以嘅,不過都幾心 'up'。。

媽:我早兩日見過你 Uncle T,我問佢有冇諗過返去柬埔寨睇吓,佢話冇!

S:佢地係咪成家都冇人喺柬埔寨架喇?

媽:冇晒喇,走晒出嚟。

S:咁我係 Uncle T 都唔會想去,傷心地!我地睇過啲資料,金邊 50 年時有 30 幾萬人,到 7 幾年時得返 3 萬幾,我諗返,50 年咪即係 Uncle T 重喺柬埔寨囉,得幾歲,佢地就係呢啲年代走。。。

媽:係呀,Uncle T 重喺果度時金邊幾咁繁榮。。。

S:佢地在金邊嗎?我記得細個成日聽你地提,好似話 Uncle T 啲朋友,阿 H 哥哥、重有個 CH,都係金邊華僑。。。

媽:Uncle T 一家應該唔係金邊,而係第二大城市 xxx (其實媽有提城市的名字,但 S 寫這個時忘記了),你細過見過果個 H 哥哥,一家 11 口,大部分死晒!

S:吓!😰😰😰。。。邊度都好啦,咁 Uncle T 個老豆都幾叻喎,成家走晒,如果好似 F 舅父,留咗一個在越南,都好慘!

媽:佢地都唔係一次過走晒架,你 Uncle T 64 年至返大陸,識咗我地,當時佢成家仍在柬埔寨。。。

SUncle T 好似老豆咁自己想返大陸㗎?

媽:係呀,所以係佢自己一個。。。

S:咁佢地一家幾時去澳門?我記得初中去佢地鋪頭時,好似已經落地生根咁。。。

媽:應該係 7 幾年,你 Uncle T 2 細佬好野,覺得唔對路,提議佢老豆賣晒啲野走,其實佢地嚟過香港的,但因為 xxx (省吓幾佰字)冇留低。。。

S:咁後期?我以為一早去添,我記得 Uncle T 有個細佬喺美國,唯一嘅細妹喺法國。。。

媽:佢 6 弟被送過去集中營。。。

S:佢 6 弟係咪後來移民澳洲但話好悶又返返嚟果個?

媽:咁應該係 5 弟,果時佢地成家已去咗澳門,佢媽返去柬埔寨搵,攪咗一大餐,終於搵到,唔知點搵咗美國領事館,最後係以佢 5 弟嘅名義,投資咗好多野,佢 5 弟直接去咗美國。。。

S:唔怪得啦,咁佢細妹呢?

媽:佢細妹個老公(當時未結婚)全家死晒,走咗出嚟,去咗法國,你 Uncle T 個妹跟埋去,所以得佢喺法國。。。

S:全家死晒😰😰😰。。。

媽:係呀,你 Uncle Sam 都係,即係 Uncle T 個堂細佬。。。

SUncle Sam? 即係細個時同我地住過,後來去咗法國果個?

媽:係呀!

S:唔怪得佢啲性格咁古縮啦⋯⋯ 後來我 9x 年第 1 次去巴黎時,打電話比佢,佢好似唔知我係邊個,我以為佢唔想見我地,冇再搵佢,如果我知,一定搵佢,代老豆去探佢。。。

可是,世事沒有如果,事隔多年,我們一家兩年前再訪巴黎時,已經沒想過要找 Uncle Sam,希望他一家安好。

和母親這一席話後,一直放不下,其實這些口術歷史,S 從小時已經 by bit & pieces 聽過不少,從沒整理過,今次想寫下來,但回來後翌日立刻上班,忙了整個星期,星期五晚長周末前,夜欄人靜,把他記下來。

看似很長的文章,其實只是歷史中一個微小得不能再小的部分,但已經涉及十多二十條人命。

感恩活在沒有戰爭的時空和地方。


No comments:

Related Posts with Thumbnails